تجديد رخصه العربيه في منتجع اكاسيا السياحي باسكندريه (ايه العظمه دي)
السلام عليكم يا احسن ناس
طبعا انتم عارفين قرف التعامل في ايه جهه حكوميه وخصوصا المرور والسجل المدني وما شابههما
المهم علشان مطولش في المقدمه بتاعه الموضوع
انا مشترك في نادي اكاسيا في اسكندريه
ومن ساعه ما اشتركت من 4 سنين وانا اعرف ان فيه مكتب بريد وخدمات
وكل شويه اقري في النادي عن خدماته واطنش
ومن سنه ونص جددت رخصه العربيه ودفعت ضريبه سنتين (في المرور وقرفه) واخدت تصريح مؤقت لمده شهر علشان بطاقتي منتهيه
وبما اني عدو الورقيات الحكوميه طنشت
وعلشان الحاجه بتدعيلي فمحدش بيقولي لا بطاقتك ولا رخصك
ندخل بقي في المفيد وصميم الموضوع
اخيرا قولت اما اجرب بقي علشان والدتي عاوزه تطلع بطاقه
روحنا مكتب الخدمات ودفعنا 40 جنيه اشتراك سنوي للاستفاده بمكتب خدمات النادي (للاعضاء)
لغير الاعضاء بتدفع 40 جنيه علي كل معامله بتعملها جوه
الموظفين بشوشين وقمه في الادب والاخلاق
المكان مكيف وشيك جدا
خطوات اصدار البطاقه كالتالي
1-اشتري استماره
2- املاها
3 - شكرا
4- تعالي يوم التلات من الساعه كذا لكذا اتصور علشان بييجي موظفين من السجل المدني مخصوص مبتسمين مش مكشرين وقمه الادب برضه في التعامل
5- اتفضل بطاقتك بعد اسبوع (:
لا والجميل انهم بيقولولك ابتسم واظبط وشك وانت بتتصور
ودا كان اول تعامل
واصلا النور كان قاطع واحنا بنتصور وبرضه صورونا علي ضوء كشافات الموبايل كائضائه خارجيه للكاميرا (:
===========================
النهارده بقي لقيت نفسي صاحي بدري وكنت في مشوار جنبهم قولت استعلم عن موضوع الرخصه بدل ما اروح المرور
1- اتفضل في المكتب ده
2- مشكلتك ايه
3- صورلي بطاقتك (سبب اصدار الرخصه المؤقته) والرخصه وكارنيه الخدمات
4- ادفع 40 جنيه
5- اتفضل تصريح مؤقت لمده اسبوع يا ابني (اه والله المدام كانت قمه في الطيبه والادب)
6- تعالي كمان اسبوع استلم رخصتك (:
الموضوع ده ما اخدش 10 دقايق او ربع ساعه فعليا
قمه الادب والاحترام والذوق في التعامل
انا عن نفسي لو مش عضو في النادي كنت دفعت ال40 جنيه ودخلت خلصت مصالحي
واصلا عضويته ممكن تدخل فيها 12 فرد ب7000 جنيه تقريبا (:
الخدمات لاعضاء النادى فقط ماعدا الشهر العقارى للاعضاء وغي الاعضاء
1- شهر عقاري
2- سجل مدني
3- تجديد رخص قياده
4-تعليم قياده سيارات
5- بطاقات رقم قومي
6- صحيفه حاله جنائيه
7-تجديد رخص السيارات
8- رخص القياده دوليه
9-تصاريح العمل
10- تصوير مستندات (((:
اتمني الموضوع يفيد الناس ويرتاحو من قرف ورشاوي واستهبال المرور
ورائحه السجل المدني الطبيعيه
تم التعديل بعد الرجوع للنادى الخدمات للاعضاء فقط
ماعدا الشهر العقارى للاعضاء وغير الاعضاء
